آئی ایم ایف معاہدہ خوش آئند، مگر معاشی استحکام ہی کافی نہیں: صدر ایف پی سی سی آئی عاطف اکرام شیخ

کراچی: فیڈریشن آف پاکستان چیمبرز آف کامرس اینڈ انڈسٹری (FPCCI) کے صدر عاطف اکرام شیخ نے آئی ایم ایف کے ساتھ اسٹاف لیول معاہدے کا خیر مقدم کرتے ہوئے اسے ملکی معیشت کے لیے ایک مثبت قدم قرار دیا ہے۔ انہوں نے بتایا کہ اس معاہدے کے تحت پاکستان کو تقریباً 1.2 ارب ڈالر کی قسط جاری کی جائے گی، جس سے نہ صرف زرمبادلہ کے ذخائر میں اضافہ ہوگا بلکہ عالمی مارکیٹ میں پاکستان پر اعتماد بھی بحال ہوگا۔

صدر ایف پی سی سی آئی نے خبردار کیا کہ صرف معاشی استحکام ہی حتمی مقصد نہیں ہونا چاہیے؛ حکومت کو چاہیے کہ وہ صنعت و تجارت کی راہ میں حائل رکاوٹوں کو فی الفور دور کرے۔ عاطف اکرام شیخ کا کہنا تھا کہ موجودہ حالات میں بلند کاروباری لاگت اور عالمی غیر یقینی صورتحال کی وجہ سے صنعت کار شدید دباؤ کا شکار ہیں۔ انہوں نے حکومت پر زور دیا کہ آئی ایم ایف پروگرام سے حقیقی فائدہ اٹھانے کے لیے فوری طور پر ڈھانچہ جاتی اصلاحات کی جائیں۔

عاطف اکرام شیخ نے سرمایہ کاری اور کاروباری اعتماد کو بڑھانے کے لیے شرحِ سود میں نمایاں اور فوری کمی کا مطالبہ بھی کیا۔ ٹیکس نظام پر بات کرتے ہوئے انہوں نے واضح کیا کہ پہلے سے ٹیکس ادا کرنے والوں پر مزید بوجھ ڈالنے کے بجائے حکومت کو ٹیکس نیٹ وسیع کرنے پر توجہ دینی چاہیے۔ ان کے بقول، صنعتوں کو سہولیات فراہم کر کے ہی ملک کو پائیدار ترقی کی راہ پر گامزن کیا جا سکتا ہے۔