خیرپور میں گیس کے بڑے ذخائر دریافت، یومیہ ایک کروڑ 72 لاکھ مکعب فٹ گیس حاصل ہوگی

کراچی: آئل اینڈ گیس ڈیولپمنٹ کمپنی لمیٹڈ (OGDCL) نے سندھ کے ضلع خیرپور میں گیس کے نئے اور وسیع ذخائر دریافت کرنے کا اعلان کیا ہے۔ کمپنی کی جانب سے پاکستان اسٹاک ایکسچینج اور لندن اسٹاک ایکسچینج کو لکھے گئے باقاعدہ خط کے مطابق، یہ دریافت ‘سمبڑ فارمیشن’ کے سہیتو-1 (Sahetu-1) نامی کنویں سے ہوئی ہے۔

دستاویزات کے مطابق اس کنویں کی کھدائی کا آغاز 24 دسمبر 2024 کو کیا گیا تھا اور اسے 3870 میٹر کی گہرائی تک کھودا گیا۔ آزمائشی مراحل کے دوران اس کنویں سے یومیہ 1 کروڑ 72 لاکھ اسٹینڈرڈ کیوبک فٹ گیس حاصل ہو رہی ہے، جبکہ گیس کا فلو 3390 پی ایس آئی (PSI) پریشر پر ریکارڈ کیا گیا ہے۔

او جی ڈی سی ایل اس منصوبے کا مرکزی آپریٹر ہے جس کے پاس 95 فیصد ملکیت ہے، جبکہ بقیہ 5 فیصد شراکت داری ‘گورنمنٹ ہولڈنگز پرائیویٹ لمیٹڈ’ کی ہے۔ ماہرین کا کہنا ہے کہ اس نئی دریافت سے ملک میں توانائی کے بحران پر قابو پانے میں مدد ملے گی اور گیس کی مقامی پیداوار میں اضافے سے درآمدی بل میں بھی کمی واقع ہوگی۔