ہائی آکٹین پر لیوی میں 200 روپے فی لیٹر اضافہ، نوٹیفکیشن جاری

اسلام آباد: وزیراعظم محمد شہباز شریف کی زیرِ صدارت منعقدہ اعلیٰ سطح کے ویڈیو لنک اجلاس میں معیشت کی بحالی اور امیر طبقے پر بوجھ ڈالنے کے لیے ایک بڑا فیصلہ کیا گیا ہے، جس کے تحت لگژری گاڑیوں میں استعمال ہونے والے ہائی آکٹین فیول (HOBC) پر پیٹرولیم لیوی میں 200 روپے فی لیٹر کا بھاری اضافہ کر دیا گیا ہے۔

وزیراعظم آفس سے جاری کردہ نوٹیفکیشن کے مطابق، ہائی آکٹین پر پہلے سے رائج 100 روپے لیوی کو بڑھا کر اب 300 روپے فی لیٹر کر دیا گیا ہے۔ اس اضافے کے بعد ملک میں ہائی آکٹین کی نئی قیمت 535 روپے فی لیٹر کی ریکارڈ سطح پر پہنچ گئی ہے۔ وزیراعظم نے اجلاس کے دوران واضح کیا کہ مہنگی اور پرتعیش گاڑیوں کے مالکان کو ملکی معیشت میں اپنا حصہ ڈالنا ہوگا، تاکہ اس سے ہونے والی بچت کو عام آدمی کے ریلیف کے لیے استعمال کیا جا سکے۔

حکومتی تخمینے کے مطابق، اس فیصلے سے قومی خزانے کو ماہانہ 9 ارب روپے کی بچت ہوگی۔ اعلامیے میں اس بات کی بھی وضاحت کی گئی ہے کہ عام شہریوں اور درمیانے طبقے کے زیرِ استعمال پیٹرول اور ڈیزل کی قیمتوں میں کوئی اضافہ نہیں کیا گیا، جبکہ پبلک ٹرانسپورٹ اور ہوائی جہازوں کے کرایوں پر بھی اس فیصلے کا کوئی اثر نہیں پڑے گا۔ اس اقدام کا مقصد براہِ راست صاحبِ حیثیت طبقے سے وسائل حاصل کر کے معیشت پر بوجھ کم کرنا ہے۔