عالمی و ملکی مارکیٹ میں سونے کی قیمتوں میں 24,300 کی کمی

کراچی: عالمی مارکیٹ کے نقشِ قدم پر چلتے ہوئے پاکستان میں بھی سونے اور چاندی کی قیمتوں میں بڑی کمی ریکارڈ کی گئی ہے۔ بین الاقوامی مارکیٹ میں سونے کی قیمت میں نمایاں مندی دیکھی گئی، جہاں فی اونس سونا 243 ڈالر کی بڑی گراوٹ کے بعد 4,767 ڈالر کی سطح پر آ گیا ہے۔

عالمی مارکیٹ میں قیمتیں گرنے کے اثرات مقامی صرافہ بازاروں پر بھی گہرے مرتب ہوئے ہیں۔ ملک بھر میں 24 قیراط فی تولہ سونے کی قیمت میں 24,300 روپے کی بڑی کمی دیکھی گئی، جس کے بعد سونا 499,462 روپے پر آگیا ہے۔ اسی طرح 10 گرام سونے کی قیمت بھی 20,833 روپے کم ہو کر 428,208 روپے ہو گئی ہے۔دوسری جانب چاندی کے نرخوں میں بھی مندی کا رجحان رہا۔ 24 قیراط فی تولہ چاندی کی قیمت 760 روپے کی کمی کے بعد 7,734 روپے کی سطح پر پہنچ گئی ہے۔ معاشی ماہرین کے مطابق عالمی سطح پر ڈالر کی قدر میں استحکام اور سرمایہ کاروں کے رجحان میں تبدیلی ان بڑی کمیوں کی بنیادی وجہ ہو سکتی ہے۔