پاکستان سٹاک ایکسچینج میں ہفتہ رفتہ منفی رجحان حاوی ، 3629 پوائنٹس کمی

مشرقِ وسطیٰ میں جاری جنگ اور علاقائی عدم استحکام کے سائے پاکستان اسٹاک ایکسچینج (پی ایس ایکس) پر بھی گہرے رہے، جس کے باعث حالیہ کاروباری ہفتہ شدید مندی کی زد میں رہا۔ سرمایہ کاروں میں بے یقینی کی لہر کے باعث کے ایس ای 100 انڈیکس 3629 پوائنٹس کی بڑی کمی کے ساتھ 153,866 کی سطح پر بند ہوا۔ ہفتے کے دوران مارکیٹ میں اتار چڑھاؤ کا اندازہ اس بات سے لگایا جا سکتا ہے کہ انڈیکس 14,505 پوائنٹس کے وسیع بینڈ میں رہا۔

ہفتہ وار رپورٹ کے مطابق، انڈیکس کی بلند ترین سطح 158,624 رہی جبکہ مندی کے دباؤ میں یہ 144,119 کی کم ترین سطح تک بھی گرا۔ حصص بازار میں ایک ہفتے کے دوران 2.25 ارب شیئرز کے سودے ہوئے جن کی مالیت 132 ارب روپے ریکارڈ کی گئی۔ اس شدید مندی کے نتیجے میں سرمایہ کاروں کے اربوں روپے ڈوب گئے اور مارکیٹ کیپٹلائزیشن 369 ارب روپے کی کمی کے بعد 17,329 ارب روپے پر آگئی ہے۔ معاشی ماہرین کا کہنا ہے کہ جب تک عالمی سطح پر تیل کی قیمتوں میں استحکام اور مشرقِ وسطیٰ میں جنگ بندی کے آثار نمایاں نہیں ہوتے، مارکیٹ میں دباؤ برقرار رہ سکتا ہے۔