ڈیپ سیک اپنا فلیگ شپ اے آئی ماڈل متعارف کرانے کیلئے تیار

چینی ٹیکنالوجی کمپنی ڈِیپ سیک (DeepSeek) ایک سال سے زائد کے انتظار کے بعد رواں ہفتے اپنا پہلا فلیگ شپ اے آئی ماڈل متعارف کرانے کے لیے تیار ہے، جس کا مقصد چیٹ جی پی ٹی اور جیمینائی جیسے امریکی حریفوں کو براہِ راست ٹکر دینا ہے۔

کمپنی کا پچھلا لارج لینگویج ماڈل، جو جنوری 2025 میں لانچ ہوا تھا، عالمی سطح پر اس وقت توجہ کا مرکز بنا جب اس نے امریکہ میں ایپ اسٹور چارٹس پر ٹاپ پوزیشن حاصل کی۔ اس کی کامیابی پر امریکی صدر ڈونلڈ ٹرمپ نے اسے امریکی ٹیکنالوجی کی صنعت کے لیے ایک ‘ویک اپ کال’ قرار دیا تھا۔

فنانشل ٹائمز کے مطابق، نیا ماڈل “ڈِیپ سیک وی 4” (DeepSeek V4) ایک ملٹی موڈل سسٹم ہوگا، جو نہ صرف متن (Text) بلکہ تصاویر اور ویڈیوز تیار کرنے کی بھی مکمل صلاحیت رکھے گا۔

رائٹرز کی رپورٹ کے مطابق، ہانگژو میں قائم اس اسٹارٹ اپ نے ایک غیر روایتی قدم اٹھاتے ہوئے اپنی نئی ٹیکنالوجی امریکی چِپ ساز کمپنی این ویڈیا (Nvidia) کے بجائے مقامی چینی سپلائرز، بالخصوص ہواوے (Huawei) کے ساتھ شیئر کی ہے۔ یہ فیصلہ عالمی ٹیکنالوجی کی صنعت کے عام طریقہ کار سے ہٹ کر ہے، کیونکہ عموماً ہارڈویئر اور سافٹ ویئر کی مطابقت کے لیے بڑی عالمی کمپنیوں کے ساتھ تعاون کیا جاتا ہے۔ ماہرین اس اقدام کو چین کی جانب سے اے آئی ہارڈویئر میں خود کفالت اور مقامی ایکو سسٹم کو مضبوط بنانے کی ایک بڑی کوشش کے طور پر دیکھ رہے ہیں۔