آبنائے ہرمز میں زیرِ سمندر کیبلز کو خطرات، ڈیجیٹل معیشت متاثر ہونے کا خدشہ

آبنائے ہرمز میں تیل کی ترسیل کے ساتھ ساتھ اب زیرِ سمندر بچھائی گئی فائبر آپٹک کیبلز کی سکیورٹی بھی عالمی توجہ کا مرکز بن گئی ہے۔ ماہرین کے مطابق یہ تنگ آبی گزرگاہ جنوبی ایشیا کو خلیجی ممالک کے راستے یورپ سے جوڑنے والی کیبلز کا اہم مرکز ہے، جہاں سے دنیا کا 99 فیصد انٹرنیٹ ٹریفک گزرتا ہے۔ ایران کی جانب سے ان کیبلز کو ڈیجیٹل معیشت کا کمزور نکتہ قرار دیے جانے کے بعد خدشات پیدا ہو گئے ہیں کہ کسی بھی ممکنہ نقصان کی صورت میں انٹرنیٹ سروسز، مالی لین دین اور کلاؤڈ سسٹمز بری طرح مفلوج ہو سکتے ہیں۔ سعودی عرب اور متحدہ عرب امارات کی مصنوعی ذہانت (AI) میں اربوں ڈالر کی سرمایہ کاری کا انحصار بھی انہی کیبلز پر ہے۔ ماہرین کا کہنا ہے کہ کشیدگی کی صورت میں ان کیبلز کو پہنچنے والا نقصان پاکستان سمیت پورے خطے میں انٹرنیٹ کی رفتار اور ڈیٹا ٹریفک کو شدید متاثر کر سکتا ہے۔