ایران کیخلاف جنگ: امریکا اور برطانیہ کے تعلقات شدید کشیدگی کا شکار

امریکا اور برطانیہ کے دیرینہ تعلقات ایران کے خلاف ممکنہ جنگ کے معاملے پر تناؤ کا شکار ہو گئے ہیں۔ امریکی صدر ڈونلڈ ٹرمپ نے برطانوی وزیراعظم کیئر اسٹارمر کو ہدفِ تنقید بناتے ہوئے کہا ہے کہ وہ چرچل جیسے بہادر رہنما ثابت نہیں ہوئے کیونکہ انہوں نے ایران پر حملوں کی حمایت سے انکار کر دیا ہے۔ یہ کشیدگی اس وقت مزید نمایاں ہوئی جب برطانیہ کے بادشاہ کنگ چارلس کے دورہ واشنگٹن کے موقع پر برطانوی سفیر کرسچن ٹرنر کا ایک تہلکہ خیز بیان سامنے آیا۔ سفیر نے واشنگٹن میں برطانوی طلبہ سے گفتگو کرتے ہوئے انکشاف کیا کہ اب امریکا کا واحد “خصوصی تعلق” (Special Relationship) صرف اسرائیل کے ساتھ رہ گیا ہے۔ فروری کے وسط میں ریکارڈ کیا گیا یہ بیان ایک ایسے وقت میں منظرِ عام پر آیا ہے جب دونوں اتحادیوں کے درمیان دفاعی حکمتِ عملی پر واضح اختلافات پائے جاتے ہیں۔