عباس عراقچی کا ٹرمپ سے 32 ہزار ہلاکتوں کا ثبوت پیش کرنے کا مطالبہ

تہران/واشنگٹن: ایرانی وزیرِ خارجہ عباس عراقچی نے امریکی صدر ڈونلڈ ٹرمپ کے اس دعوے کو سختی سے مسترد کر دیا ہے جس میں انہوں نے ایران میں حالیہ مظاہروں کے دوران 32 ہزار ہلاکتوں کا الزام عائد کیا تھا۔ عباس عراقچی نے واشنگٹن کو براہِ راست پیغام بھیجا ہے کہ اگر انہیں ایرانی اعداد و شمار پر شبہ ہے تو وہ ان 32 ہزار ہلاکتوں کا ٹھوس ثبوت پیش کریں۔

ایرانی حکومت کا موقف ہے کہ انہوں نے مکمل شفافیت کا مظاہرہ کرتے ہوئے متاثرین کی فہرست جاری کر دی ہے، جس کے مطابق ہلاک ہونے والوں میں 3,117 عام شہری اور 200 سکیورٹی اہلکار شامل ہیں۔

دوسری جانب، ڈونلڈ ٹرمپ نے ایران پر سنگین الزامات لگاتے ہوئے کہا تھا کہ جنوری کے مظاہروں میں ہزاروں افراد مارے گئے اور 800 سے زائد افراد کو پھانسی دیے جانے کا خدشہ ہے۔ غیر ملکی میڈیا کے مطابق، انسانی حقوق کے حساس معاملے پر تہران اور واشنگٹن کے درمیان سفارتی کشیدگی مسلسل برقرار ہے، جس سے خطے کی صورتحال مزید پیچیدہ ہو رہی ہے۔