جیل سے رہائی کے بعد راجپال یادیو کا پہلا بیان سامنے آگیا

بالی ووڈ کے معروف مزاحیہ اداکار راجپال یادیو کو دہلی ہائی کورٹ کی جانب سے عارضی ضمانت ملنے کے بعد تہاڑ جیل سے رہا کر دیا گیا ہے۔

راجپال یادیو کو تقریباً 9 کروڑ بھارتی روپوں کے چیک باؤنس اور قرض کے تنازعے کے سلسلے میں قید کا سامنا کرنا پڑا تھا۔ اداکار نے دسمبر 2025 میں عدالت میں پیش ہونے کے بعد خود کو حکام کے حوالے کیا تھا۔عدالت نے مقدمے کی سماعت کے بعد انہیں 18 مارچ 2026 تک عارضی ضمانت دے دی ہے، جس کے تحت وہ حتمی فیصلے تک رہا رہ سکیں گے۔جیل سے رہائی کے بعد میڈیا سے گفتگو کرتے ہوئے راجپال یادیو نے مداحوں اور عدالت کا شکریہ ادا کیا۔ انہوں نے کہا کہ ان کا 30 سالہ فلمی کیریئر 2027 میں مکمل ہو جائے گا اور وہ آئندہ بھی لوگوں کے ساتھ مل کر کام کرنے کا ارادہ رکھتے ہیں۔اداکار نے بتایا کہ اپنے کیریئر کے دوران پورے ملک اور بالی ووڈ نے ان کا ساتھ دیا، جس کی بدولت وہ تقریباً 200 سے 250 فلموں میں کام کر سکے۔ انہوں نے کہا، ’’اگر مجھے کسی الزام کا سامنا کرنا پڑا ہے تو میں اس کا جواب بھی دوں گا اور عدالت میں پوری طرح پیش ہوں گا۔‘‘