روس کی کیف پر بیلسٹک میزائلوں کی بارش، 630 ڈرون داغنے کا دعویٰ

امریکی ثالثی میں امن مذاکرات کی بحالی کی کوششوں کے باوجود روس اور یوکرین کے درمیان جنگ میں شدید تصادم دیکھنے میں آیا ہے، جہاں روس نے یوکرینی دارالحکومت کیف پر بیلسٹک میزائلوں کی بارش کی، جبکہ یوکرین نے جواب میں ماسکو کی جانب 630 ڈرونز داغنے کا دعویٰ کیا ہے۔

یوکرینی صدر وولودی میر زیلنسکی کے مطابق روس نے تین مختلف مرحلوں میں کم از کم 21 بیلسٹک میزائل داغے، جن میں سے تین میزائل کلسٹر بموں سے لیس تھے۔ ان حملوں میں یوکرین کے 12 مختلف علاقوں کو نشانہ بنایا گیا؛ دارالحکومت کیف میں 2 افراد ہلاک اور بچوں سمیت 34 زخمی ہوئے۔ علاوہ ازیں، خارکیف کے قریب لوزووا میں ایک بازار پر حملے کے نتیجے میں 2 افراد جاں بحق اور 36 زخمی ہوئے، جبکہ دنیپروپیٹرووسک میں بھی ایک شخص ہلاک ہوا۔

دوسری جانب، روسی حکام کے مطابق ماسکو کی سمت آنے والے اکثر یوکرینی ڈرونز کو فضا میں ہی تباہ کر دیا گیا، تاہم دارالحکومت کے قریب 2 افراد زخمی ہوئے۔ اس کے علاوہ سرحدی علاقے بیلگورود میں یوکرینی ڈرون حملے سے ایک شخص ہلاک اور ایک شدید زخمی ہوا۔ دونوں ممالک کی جانب سے ایک دوسرے پر کیے جانے والے ان شدید حملوں سے خطے میں کشیدگی انتہائی اعلیٰ سطح پر پہنچ گئی ہے۔