امریکی صدر کا ایلون مسک سے رابطہ، یوکرین کیلئے انٹرنیٹ سروس پر پابندیاں ختم کرنے کا مطالبہ

امریکی صدر ڈونلڈ ٹرمپ نے معروف ارب پتی کاروباری شخصیت ایلون مسک سے رابطہ کر کے یوکرین کے لیے ‘اسٹار لنک’ (Starlink) سیٹلائٹ انٹرنیٹ سروس پر عائد پابندیاں ختم کرنے کی ہدایت کی ہے۔

امریکی اور یوکرینی حکام کے مطابق دونوں رہنماؤں کے درمیان بات چیت کے بعد سروس کی کارکردگی میں کچھ بہتری آئی ہے، تاہم یوکرین میں اس کی رفتار بدستور محدود ہے۔ وال اسٹریٹ جرنل کی رپورٹ کے مطابق صدر ٹرمپ نے اسٹار لنک کی رفتار 160 کلومیٹر فی گھنٹہ تک محدود رہنے پر شدید ناراضی کا اظہار کیا، جبکہ یوکرینی صدر وولودی میر زیلنسکی نے بھی تصدیق کی ہے کہ سروس مکمل طور پر بحال نہیں ہو سکی اور وہ اس معاملے پر امریکی وزیرِ خارجہ مارکو روبیو سے جلد گفتگو کی امید رکھتے ہیں۔

واضح رہے کہ امریکی وزیرِ خارجہ مارکو روبیو نے پہلے ہی یہ موقف اپنایا تھا کہ اسٹار لنک تک رسائی کو کنٹرول کرنے کا اختیار وائٹ ہاؤس کے پاس نہیں بلکہ ایلون مسک کی کمپنی اسپیس ایکس (SpaceX) کے پاس ہے۔ یوکرین جنگ کے دوران سرحدی محاذ پر مواصلات اور ڈرون آپریشنز کے لیے اسٹار لنک پر انحصار کرتا ہے، جبکہ اس سروس کی محدود رفتار اور پابندیوں سے روس کے خلاف یوکرینی فضائی دفاعی اور حملہ آور ڈرون مشنز شدید متاثر ہو رہے ہیں۔