پیوٹن کو انسان دوست قرار دینے پر زیلنسکی کی اسٹیو وٹکوف پر تنقید

یوکرینی صدر وولودی میر زیلنسکی نے روسی صدر ولادیمیر پیوٹن کو “انسان دوست” قرار دینے پر امریکی نمائندے اسٹیو وٹکوف کو شدید تنقید کا نشانہ بناتے ہوئے دوٹوک الفاظ میں کہا ہے کہ روسی صدر امن کے قیام کے لیے ذرا برابر بھی سنجیدہ نہیں ہیں اور وہ محض بے گناہ لوگوں کی جانوں سے کھیل رہے ہیں۔

اپنے ایک بیان میں یوکرینی صدر کا کہنا تھا کہ امریکی صدر ڈونلڈ ٹرمپ کے ساتھ ان کے اختلافات کا تعلق کسی ذاتی رنجش سے نہیں ہے، بلکہ روس پر سے پابندیاں اٹھانے کے نتیجے میں پیوٹن کی پوزیشن مزید مستحکم ہو جائے گی۔ صدر زیلنسکی نے واضح کیا کہ یوکرین کسی بھی صورت اپنے مقبوضہ علاقوں سے دستبردار نہیں ہوگا اور نہ ہی روس کے قبضے والے یوکرینی علاقوں کو روسی سرزمین تسلیم کیا جائے گا۔

انہوں نے تجویز دی کہ موجودہ محاذوں پر فوری جنگ بندی کے بعد ہی آگے کی بات چیت کا آغاز کیا جا سکتا ہے۔ اس کے ساتھ ہی انہوں نے مغربی اتحادیوں سے پرزور مطالبہ کیا کہ وہ روس پر عائد پابندیاں برقرار رکھیں اور یوکرین کو دفاعی صلاحیتوں کو بڑھانے کے لیے مؤثر میزائل فراہم کریں۔