جماعت اسلامی کا آج ملک کے 150 شہروں میں بیک وقت احتجاج اور دھرنوں کا اعلان

امیر جماعت اسلامی پاکستان حافظ نعیم الرحمان نے ملک گیر احتجاج کا اعلان کرتے ہوئے کہا ہے کہ پٹرولیم لیوی اور دیگر ناانصافیوں کے خلاف آج ملک کے 150 شہروں میں بیک وقت احتجاجی مظاہرے اور دھرنے دیے جائیں گے۔

کراچی میں ایک تقریب سے خطاب کرتے ہوئے حافظ نعیم الرحمان نے وفاقی حکومت کو سخت انتباہ جاری کیا کہ اگر وزیراعظم نے پٹرولیم لیوی کی شکل میں عائد بھتہ ختم نہ کیا تو جماعت اسلامی اسلام آباد کی طرف ملک گیر مارچ کرے گی۔ انہوں نے واضح کیا کہ ان کی جماعت محض پوائنٹ اسکورنگ نہیں بلکہ حقیقی نظام کی تبدیلی اور عوام کی خدمت کے لیے جدوجہد کر رہی ہے۔

امیر جماعت اسلامی نے مزید کہا کہ پاکستان کی کوئی دوسری سیاسی جماعت عوامی مسائل پر بات کرنے کو تیار نہیں، جبکہ جماعت اسلامی نے پٹرولیم لیوی کے خلاف مؤثر تحریک چلا کر ہر شہری کو اس ٹیکس سے آگاہ کیا ہے۔ کراچی کے حوالے سے بات کرتے ہوئے ان کا کہنا تھا کہ جماعت اسلامی کا مقابلہ کسی سیاسی پارٹی سے نہیں بلکہ اپنے زیرِ انتظام 9 ٹاؤنز میں تعمیر و ترقی کے کاموں کو بہتر بنانے سے ہے۔