’قدوسی صاحب کی بیوہ‘ کے بعد مختلف کرداروں کی پیشکش نہیں ہوئی، وقار حسین

کراچی: پاکستانی میڈیا انڈسٹری سے وابستہ معروف اداکار و سلیبریٹی میک اپ آرٹسٹ وقار حسین نے کہا ہے کہ ڈرامہ سیریل قدوسی صاحب کی بیوہ کے بعد انہیں نئے اور مختلف نوعیت کے کرداروں کی پیشکش نہیں کی گئی۔

حال ہی میں انہوں نے ایک نجی ٹی وی چینل کے پروگرام میں بطور مہمان شرکت کی، جہاں انہوں نے انڈسٹری میں پائے جانے والے متعصب رویوں اور اندرونی معاملات پر کھل کر گفتگو کی۔ وقار حسین کا کہنا تھا کہ مذکورہ ڈرامے کے بعد یہ تاثر قائم ہو گیا کہ وہ کسی منفرد اور چیلنجنگ کردار ادا نہیں کر سکتے، حالانکہ وہ ایسے کرداروں کے لیے تیار تھے۔

انہوں نے بتایا کہ موجودہ دور میں میک اپ آرٹسٹس کو بعض پروڈیوسرز اور سٹارز کی جانب سے ہتک آمیز رویّے کا سامنا کرنا پڑتا ہے۔ کئی بڑے اداکار اپنے ذاتی میک اپ آرٹسٹس کو سیٹ پر ساتھ لاتے ہیں، جس کی وجہ سے دیگر سینئر فنکاروں کے لیے حالات بعض اوقات غیر منطقی ہو جاتے ہیں۔

وقار حسین نے کہا کہ بعض اوقات انہیں کہا جاتا ہے کہ وہ پوری ٹیم کا میک اپ کریں، جبکہ مرکزی اداکار یا اداکارہ اپنا ذاتی آرٹسٹ ساتھ لاتے ہیں، جو پیشہ ورانہ طور پر نامناسب طرزِ عمل ہے۔