نامور بھارتی گلوکارہ انتقال کرگئیں

بھارتی ریاست اڑیسا کی مشہور گلوکارہ گیتا پٹنائک برین اسٹروک کے باعث 73 برس کی عمر میں انتقال کر گئیں۔

بھارتی میڈیا رپورٹس کے مطابق اڑیا موسیقی کی صنعت کی ممتاز ترین آوازوں میں شمار ہونے والی گیتا پٹنائک گزشتہ ہفتے برین اسٹروک کے بعد ایک اسپتال میں زیرِ علاج تھیں، اور گزشتہ روز دوران علاج انتقال کر گئیں۔

73 سالہ گلوکارہ کو جمعرات کے روز ایک تقریب کے دوران طبیعت خراب ہونے پر پہلے کٹک کے کیپیٹل اسپتال منتقل کیا گیا، جہاں برین اسٹروک کی تصدیق ہوئی۔ بعد ازاں انہیں کٹک کے ایک نجی ہسپتال منتقل کیا گیا۔ ان کے بہنوئی پردوش پٹنائک کے مطابق اتوار کے روز ڈاکٹروں نے انہیں دماغی طور پر مردہ قرار دیا۔ ان کی میت پیر کے روز ان کے کٹک میں واقع گھر منتقل کی جائے گی، جس کے بعد آخری رسومات ادا کی جائیں گی۔

کیریئر:
گیتا پٹنائک کا کیریئر پانچ دہائیوں پر محیط رہا۔ انہوں نے اپنے کیریئر میں متعدد فنکاروں اور موسیقاروں کے ساتھ کام کیا، تاہم انہیں خاص طور پر لیجنڈری اڑیا گلوکار اکشے موہنتی کے ساتھ گائے گئے گانوں کی وجہ سے شہرت حاصل ہوئی۔ انہوں نے فلم ’ججبَر‘ کے مقبول گیت ’فُر کِنا اُڈیگالا بانی‘ سمیت متعدد مشہور اوڑیا گانوں کو اپنی آواز دی۔