امریکا خاموشی سے مشرق وسطیٰ میں تعینات امریکی فوجیوں میں کمی کر رہا ہے، امریکی ٹی وی کا دعویٰ

امریکی نشریاتی ادارے سی بی ایس (CBS) نے ایک سینیئر امریکی عہدیدار اور فوجی اہلکار کے حوالے سے دعویٰ کیا ہے کہ امریکا مشرق وسطیٰ میں حوثی جنگجوؤں کی کارروائیوں اور ایران کی جانب سے براہِ راست ملنے والی دھمکیوں کے پیشِ نظر اپنے فوجی اڈوں سے اہلکاروں کی موجودگی خاموشی سے کم کر رہا ہے۔

رپورٹ منظرِ عام پر آنے کے بعد امریکی سینٹرل کمانڈ (CENTCOM) کے ترجمان کیپٹن ٹم ہاکنز نے اس پر ردِعمل دیتے ہوئے وضاحت کی ہے کہ امریکی فوج مختلف آپریشنل ضروریات اور مشنز کے لیے معمول کے مطابق فورسز اور فوجی سامان کی نقل و حرکت (Repositioning) کرتی رہتی ہے۔ ترجمان نے واضح کیا کہ سیکیورٹی اور آپریشنل وجوہات کی بنا پر ان اندرونی نقل و حرکات کی تفصیلات عام نہیں کی جا سکتیں۔

ترجمان سینٹرل کمانڈ کا مزید کہنا تھا کہ امریکی افواج مشرق وسطیٰ کے خطے میں امریکی شہریوں، سفارتی عملے اور قومی و معاشی مفادات کے تحفظ کے لیے مکمل طور پر چوکس ہیں اور کسی بھی ممکنہ صورتحال سے نمٹنے کے لیے اعلیٰ ترین سطح پر تیار ہیں۔