یران اسرائیل پر حملےکیلئے ایٹم بم بنا رہا ہے، نیتن یاہو کا دعویٰ

اسرائیلی وزیراعظم بنجمن نیتن یاہو نے ایک بار پھر ایران کے خلاف انتہائی سخت اور جارحانہ موقف اپنااتے ہوئے انکشاف کیا ہے کہ اس بار اسرائیل امریکی صدر ڈونلڈ ٹرمپ سے مشورہ کیے بغیر بھی ایران پر حملہ کر سکتا ہے۔

امریکی میڈیا کی رپورٹس کے مطابق اسرائیلی فوجی افسران کی گریجویشن تقریب سے خطاب کرتے ہوئے نیتن یاہو نے دعویٰ کیا کہ ایرانی سپریم لیڈر مجتبیٰ خامنہ ای نے اپنے والد کے نقشِ قدم پر چلتے ہوئے ایٹم بم کی تیاری کے عمل کو دوبارہ شروع کرنے کا فیصلہ کیا ہے۔ نیتن یاہو کا کہنا تھا کہ ایران کا ایٹمی پروگرام اسرائیل کی سلامتی اور وجود کے لیے سب سے بڑا خطرہ ہے، اور اس دائمی مسئلے کا واحد حل ایران میں موجود حکومت کا تختہ الٹنا ہی ہے۔

اسرائیلی وزیراعظم نے بتایا کہ انہوں نے فوج اور تمام خفیہ ایجنسیوں کو حکومتِ ایران کے خاتمے کی حکمت عملی پر کام کرنے کی ہدایت جاری کر دی ہے۔ انہوں نے مزید کہا کہ امریکی صدر ڈونلڈ ٹرمپ نے بقیہ مقاصد مکمل کرنے کے لیے آمادگی ظاہر کی ہے اور یہ کام اسرائیل کی شراکت سے ہی ممکن ہوگا۔ نیتن یاہو نے ان تمام خبروں کی یکسر تردید کی جن میں کہا گیا تھا کہ اکتوبر کے آغاز میں صدر ٹرمپ نے اسرائیل کو ایران پر حملوں سے روکا تھا۔