اس بار اسرائیل ٹرمپ سے پوچھے بغیر ایران پر حملہ کرے گا، نیتن یاہو

اسرائیلی وزیراعظم بنیامین نیتن یاہو نے ایک بار پھر ایران کے خلاف سخت موقف اپناتے ہوئے اعلان کیا ہے کہ اس بار اسرائیل امریکی صدر ڈونلڈ ٹرمپ سے پوچھے بغیر ایران پر حملہ کرے گا۔

اپنے حالیہ بیان میں نیتن یاہو کا کہنا تھا کہ ایران کی جانب سے اسرائیل کے وجود کو سنگین خطرات لاحق ہیں اور وہ اسرائیل پر حملے کے مقصد سے ایٹم بم تیار کر رہا ہے۔ انہوں نے دعویٰ کیا کہ امریکی صدر ڈونلڈ ٹرمپ نے انہیں یقین دہانی کرائی ہے کہ وہ ’کام حتمی انجام تک پہنچانے کے لیے تیار‘ ہیں، جو کہ صرف اسرائیل کی مدد سے ہی ممکن ہوگا۔

اس کے ساتھ ہی نیتن یاہو نے ان تمام خبروں کی یکسر تردید کی کہ اکتوبر کے آغاز میں صدر ٹرمپ نے اسرائیل کو ایران پر حملوں سے روک دیا تھا۔ واضح رہے کہ میڈیا رپورٹس میں یہ دعویٰ کیا جا رہا تھا کہ اسرائیلی فوج نے 10 اور 11 اکتوبر کو ایران پر حملے کی مکمل تیاری کر لی تھی، لیکن صدر ٹرمپ نے امریکی وسط مدتی انتخابات (Midterms) سے قبل اسرائیل کو اس سے روک دیا تھا۔