یورپ میں مظاہروں میں شدت: فرانس میں مرکزی طلبہ یونین کی ہفتہ کو احتجاجی ریلیوں کی کال

یورپ بھر میں شدید مہنگائی، بڑھتی ہوئی بے روزگاری اور مہنگی تعلیم کے خلاف عوامی اور طلبہ احتجاج کی لہر میں اچانک شدید تلخی اور شدت آ گئی ہے، جس کے بعد متعدد ممالک کی حکومتوں نے مظاہرین کے خلاف سخت اقدامات شروع کر دیے ہیں۔

فرانس میں مرکزی طلبہ یونین کی جانب سے پیرس سمیت مختلف شہروں میں احتجاجی ریلیوں کی کال کے بعد صدر ایمانوئل میکرون نے مظاہروں پر پابندیاں مزید سخت کر دی ہیں، جبکہ لیون شہر میں ہفتے کے تمام مظاہروں پر مکمل پابندی عائد کر دی گئی ہے۔ اسپین میں مظاہرین کی پولیس کے ساتھ شدید جھڑپیں ہوئیں، جہاں پتھراؤ اور آتش گیر مواد سے کیے گئے حملوں کے نتیجے میں 12 پولیس اہلکار زخمی ہو گئے۔

پرتگال کے دارالحکومت لزبن میں مہنگائی کے خلاف زبردست مظاہرہ ہوا، جہاں پولیس نے مظاہرین کے کیمپ اکھاڑ کر 55 افراد کو گرفتار کر لیا۔ دوسری جانب پولینڈ کے 20 سے زائد شہروں میں خواتین نے اسقاطِ حمل کے قوانین میں تبدیلی کے لیے سڑکوں پر احتجاج کیا۔ اس کے علاوہ بیلجیم میں ٹیوشن فیسوں میں اضافے کے خلاف طلبہ نے یونیورسٹیوں میں مظاہرے کیے، جبکہ اٹلی اور البانیہ میں بھی ہزاروں افراد حکومت مخالف نعرے بازی کرتے ہوئے سڑکوں پر نکل آئے۔