تامل فلموں کے معروف اداکار وجے کی سیاسی ریلی میں مداح ہلاک

جنوبی بھارت کے تامل فلموں کے معروف اداکار اور سیاستدان وجے  کی سیاسی ریلی میں ایک شخص ہلاک ہو گیا۔

بھارتی میڈیا کے مطابق جمعہ کو تامل ناڈو کے شہر سالیم میں وجے کی ریلی کے دوران 37 سالہ شخص سورج ریلی کے دوران گر کر زخمی ہوا۔ اسے فوری طور پر ہسپتال منتقل کیا گیا جہاں ڈاکٹرز نے اسے مردہ قرار دیا۔ ہلاک شخص وجے کا بہت بڑا مداح تھا اور اس کا تعلق مہاراشٹر سے بتایا گیا ہے۔

پولیس نے واقعے کی تحقیقات شروع کر دی ہیں اور حادثے کی وجوہات معلوم کرنے میں مصروف ہے۔

خیال رہے کہ گزشتہ برس ستمبر میں بھی تامل ناڈو کے ضلع کارور میں وجے کی سیاسی جماعت تاملاگا ویتری کازاگم کی ریلی میں بھگڈر مچنے سے 40 افراد ہلاک اور 100 سے زائد زخمی ہو گئے تھے، جو اس نوعیت کے حادثات کی یاد دلاتا ہے۔