بینیتا ڈیوڈ کا رنگ گورا کرنے والے انجکشنز کے استعمال کا اعتراف

کراچی: پاکستانی شوبز انڈسٹری کی معروف اداکارہ بینیتا ڈیوڈ نے رنگ گورا کرنے والے انجیکشنز اور مختلف بیوٹی پروسیجرز سے متعلق کھل کر اعتراف کر لیا ہے۔

بینیتا ڈیوڈ نے ایک نجی پوڈکاسٹ میں شرکت کے دوران کہا کہ ان کی موجودہ خوبصورتی مختلف بیوٹی پروسیجرز کا نتیجہ ہے اور وہ اس حقیقت کو چھپانا نہیں چاہتیں۔ اداکارہ کا کہنا تھا کہ انہیں گوری رنگت کا شوق بلکہ جنون ہے اور وہ سفید رنگت کو پسند کرتی ہیں۔

انہوں نے بتایا کہ 2017 یا 2018 میں انہوں نے متعدد وائٹننگ انجیکشنز لگوائے تھے، جن کے باعث ان کی رنگت میں نمایاں تبدیلی آئی۔ اداکارہ کے مطابق وہ اس قدر گوری ہو گئی تھیں کہ مارننگ شوز میں بھی ان سے اس حوالے سے سوالات کیے جانے لگے تھے۔

بینیتا ڈیوڈ نے کہا کہ اس وقت بھی انہوں نے اس بات کو نہیں چھپایا تھا اور واضح طور پر بتایا تھا کہ ان کی رنگت وائٹننگ انجیکشنز کا نتیجہ ہے، اور اب بھی وہ اس بارے میں کھل کر بات کر رہی ہیں۔

اداکارہ نے مزید کہا کہ رنگ گورا کرنے کے علاوہ دیگر بیوٹی پروسیجرز کے ذریعے بھی انہوں نے اپنی خوبصورتی کو نکھارا ہے اور آئندہ بھی وہ وائٹننگ پروسیجرز کرواتی رہیں گی۔