جوا ایپس کی تشہیر: عروب جتوئی کی عبوری ضمانت میں توسیع

جوئے کی ایپس کی غیر قانونی تشہیر کے مقدمے میں یوٹیوبر ڈکی بھائی کی اہلیہ عروب جتوئی کی عبوری ضمانت میں عدالت نے 11 فروری تک توسیع کر دی ہے۔ عدالت نے عروب جتوئی کی حاضری معافی کی درخواست منظور کرتے ہوئے آئندہ تاریخ مقرر کر دی۔

ایڈیشنل ڈسٹرکٹ اینڈ سیشن جج منصور احمد قریشی نے کیس کی سماعت کی۔ سماعت کے دوران بتایا گیا کہ این سی سی آئی اے کی جانب سے عروب جتوئی کے خلاف مقدمہ درج ہے اور عبوری ضمانت کی میعاد ختم ہونے پر انہیں عدالت میں پیش ہونا تھا۔

عروب جتوئی کی جانب سے دائر درخواست میں مؤقف اختیار کیا گیا کہ وہ بیماری کے باعث عدالت میں پیش ہونے سے قاصر ہیں، لہٰذا حاضری سے استثنا دیا جائے۔ عدالت نے دلائل سننے کے بعد حاضری معافی منظور کرتے ہوئے عبوری ضمانت میں توسیع کر دی۔