جرمنی کیلئے پاکستانی مصنوعات کی برآمدات میں اضافہ

جرمنی کے لیے پاکستانی مصنوعات کی برآمدات میں اضافہ دیکھنے میں آیا ہے۔ گرین پاکستان پراجیکٹ کے پہلے مرحلے میں 15 ٹاول ایکسپورٹرز نے جرمن ڈیو ڈیلیجینس لاء کے مطابق اپنی سسٹین ایبلٹی رپورٹس مکمل کر کے 300 جرمن درآمد کنندگان تک براہِ راست رسائی حاصل کرلی ہے۔

ٹاول مینوفیکچررز اینڈ ایکسپورٹرز ایسوسی ایشن میں ورکشاپ سے خطاب کرتے ہوئے جرمن قونصل کمرشل اینڈ اکنامک افئیرز مسز اینا کلاس نے کہا کہ پاکستانی ٹیکسٹائل مصنوعات کی جرمنی میں کافی مانگ ہے اور پاکستان اور جرمنی کے درمیان ٹیکسٹائل سیکٹر میں گہرے تعلقات ہیں۔

گرین پاکستان پراجیکٹ کے سربراہ ڈاکٹر مائیکل اریڈز نے بتایا کہ جرمنی کی حکومت نے ایک ڈیش بورڈ بنایا ہے جس کے ذریعے سسٹین ایبلٹی رپورٹ مکمل کرنے والے پاکستانی ایکسپورٹرز کے نام اور پروفائل آویزاں ہوں گے، اور یہ ڈیش بورڈ 300 جرمن درآمد کنندگان کے ساتھ براہِ راست رابطے اور برآمدی آرڈرز میں اضافہ کرنے میں مدد کرے گا۔