بنگلا دیش میں سیلاب نے تباہی مچادی، 44 افراد جاں بحق، لاکھوں شہری محصور

بنگلہ دیش میں مون سون کی شدید بارشوں کے آغاز کے ساتھ ہی سیلاب اور لینڈ سلائیڈنگ نے بڑے پیمانے پر تباہی مچا دی ہے، جس کے نتیجے میں ملک کے جنوب مشرقی علاقوں میں اب تک 44 افراد جاں بحق اور 10 لاکھ سے زائد شہری محصور ہو کر رہ گئے ہیں۔ بنگلہ دیشی وزارتِ ڈیزاسٹر مینجمنٹ کے مطابق، چٹوگرام، کوکس بازار اور باندربن سمیت 7 اضلاع سیلاب کی لپیٹ میں ہیں، جہاں 2 لاکھ 67 ہزار سے زائد مکانات زیرِ آب آ چکے ہیں۔ سیلابی صورتحال کے باعث متاثرہ علاقوں میں بجلی کی فراہمی معطل ہے اور شہریوں کو پینے کے صاف پانی اور خوراک کی شدید قلت کا سامنا ہے۔ شدید بارشوں کی وجہ سے کوکس بازار میں قائم روہنگیا مہاجرین کے کیمپ بھی بری طرح متاثر ہوئے ہیں، جہاں مٹی کے تودے گرنے سے خواتین اور بچوں سمیت 16 افراد جان کی بازی ہار چکے ہیں۔ ابتر صورتحال کے پیشِ نظر بنگلہ دیشی فوج اور بحریہ کے دستے کشتیوں کے ذریعے متاثرین تک امدادی سامان پہنچا رہے ہیں، جبکہ وزیرِ ڈیزاسٹر مینجمنٹ اقبال حسین نے متاثرہ علاقوں کا دورہ کرتے ہوئے شہریوں کو فوری طور پر قریبی پناہ گاہوں میں منتقل ہونے کی ہدایت کی ہے۔