امریکا نے اپنے دو طیارہ بردار بحری جہاز ایران کے قریب پہنچا دیے

امریکا نے ایران کے ساتھ بڑھتی ہوئی کشیدگی کے پیشِ نظر اپنے دو بڑے ایٹمی طیارہ بردار بحری جہاز “یو ایس ایس ابراہم لنکن” اور “یو ایس ایس جارج ایچ ڈبلیو بش” ایران کے قریبی پانیوں میں تعینات کر دیے ہیں۔ امریکی اخبار نیویارک پوسٹ کے مطابق، اس غیر معمولی فوجی نقل و حرکت کا مقصد خطے میں بحری سلامتی و تجارتی جہازوں کے تحفظ کو یقینی بنانا اور ضرورت پڑنے پر ایران پر عسکری و سفارتی دباؤ بڑھانا ہے۔ بحری نقل و حرکت پر نظر رکھنے والے اداروں نے تصدیق کی ہے کہ دونوں امریکی کیریئر اسٹرائیک گروپس خلیجِ عمان پہنچ چکے ہیں، جہاں سے وہ عالمی تیل کی تجارت کے لیے انتہائی اہم آبی گزرگاہ “آبنائے ہرمز” پر گہری نظر رکھ سکیں گے۔ واضح رہے کہ امریکی صدر ڈونلڈ ٹرمپ کی جانب سے ایران کے ساتھ جنگ بندی ختم ہونے کے بیان کے بعد خلیجی پانیوں میں دونوں ممالک کے درمیان فضائی اور میزائل حملوں کا تبادلہ بھی ہو چکا ہے۔ امریکی سینٹرل کمانڈ (سینٹ کام) کا کہنا ہے کہ اس وقت مشرقِ وسطیٰ میں امریکا کے 20 سے زائد جنگی جہاز معمول کے مطابق کارروائیاں کر رہے ہیں، تاہم حکام نے ایران کی ممکنہ بحری ناکہ بندی سے متعلق آپریشنل سوالات پر تبصرہ کرنے سے گریز کیا ہے۔