اشتہاری ملزم کی شادی میں شرکت پر پولیس کی دوڑیں لگ گئیں

خیبرپختونخوا کے ضلع نوشہرہ کے علاقے تاروجبہ میں مشہور کبابی رامبیل کے نواسوں کی شادی کی تقریب اس وقت میدانِ جنگ کا منظر پیش کرنے لگی جب پشاور پولیس نے ایک خطرناک اشتہاری ملزم کی موجودگی کی اطلاع پر اچانک چھاپہ مار دیا۔ ایکسپریس نیوز کے مطابق، ارمڑ پولیس کو مطلوب ایک اہم اشتہاری کی شادی میں شرکت کی خفیہ اطلاع پر پولیس کی دوڑیں لگ گئیں، تاہم کارروائی کے دوران مرکزی اشتہاری تو موقع سے فرار ہونے میں کامیاب ہو گیا لیکن پولیس نے وہاں موجود اسی گینگ کے دیگر 5 مطلوب اشتہاری ملزمان کو دھر لیا۔ گرفتاری کے وقت ملزمان کے قبضے سے بھاری مقدار میں اسلحہ بھی برآمد کیا گیا ہے۔ ذرائع کے مطابق، پولیس نے مبینہ طور پر اشتہاریوں کو پناہ دینے اور سہولت کاری کرنے کے الزام میں رامبیل کے ایک بیٹے کو بھی حراست میں لیا ہے۔ پولیس نے گرفتار ملزمان کے نام اور شناخت کو فی الحال صیغہ راز میں رکھتے ہوئے انہیں پشاور منتقل کر دیا ہے، جہاں ان کے مجرمانہ ریکارڈ کی چھان بین اور مزید تفتیش کا آغاز کر دیا گیا ہے۔