علما کرام ڈیجیٹل کرنسی کے حوالے سے شرعی جائزہ لیں، بلال بن ثاقب کی مفتی تقی عثمانی سےملاقات میں اپیل

ورچوئل ایسیٹس ریگولیٹری اتھارٹی کے چیئرمین بلال بن ثاقب نے ممتاز عالمِ دین مفتی تقی عثمانی سے ایک اہم اور تعمیری ملاقات کی ہے، جس میں انہوں نے کرپٹو کرنسی، بلاک چین اور جدید ڈیجیٹل ٹیکنالوجیز کے حوالے سے علمائے کرام سے جامع شرعی جائزہ لینے کی اپیل کی ہے۔ سماجی رابطے کی ویب سائٹ (ایکس) پر جاری اپنے ایک بیان میں بلال بن ثاقب نے بتایا کہ ملاقات کے دوران دونوں شخصیات اس بنیادی مقصد پر متفق تھیں کہ پاکستانی عوام کو ہر قسم کی دھوکہ دہی، استحصال اور مالی نقصان سے محفوظ رکھا جائے۔ انہوں نے مفتی تقی عثمانی کے سامنے مؤقف اختیار کیا کہ بلاک چین، اسٹیبل کوائنز اور حقیقی اثاثوں پر مبنی ٹوکنائزڈ اثاثے ایک وسیع میدان ہیں، اس لیے ان سب کا جائزہ ایک ہی زاویے سے لینے کے بجائے ان کی تکنیکی نوعیت کا باریک بینی سے تجزیہ کرنا ضروری ہے۔ چیئرمین ورچوئل اتھارٹی نے اس خواہش کا اظہار کیا کہ معزز علمائے کرام، ریگولیٹری اداروں اور صنعت کے ماہرین کے درمیان مسلسل مشاورت کا عمل جاری رہنا چاہیے تاکہ پاکستان کی ڈیجیٹل پالیسی اسلامی اصولوں اور جدید ٹیکنالوجی کی درست سمجھ بوجھ کے مطابق مرتب کی جا سکے۔