کل جماعتی حریت کانفرنس کا 13 جولائی یومِ شہدائے کشمیر منانے کا اعلان

کل جماعتی حریت کانفرنس نے 13 جولائی کو ‘یومِ شہدائے کشمیر’ شایانِ شان انداز میں منانے کا اعلان کرتے ہوئے مظفرآباد میں بڑے پیمانے پر ریلی اور جلسے کے انعقاد کا فیصلہ کیا ہے۔ مظفرآباد میں حریت کانفرنس کے کنوینئر غلام محمد صفی، میئر سکندر گیلانی، جنرل سیکرٹری ایڈووکیٹ پرویز احمد اور دیگر رہنماؤں نے مشترکہ پریس کانفرنس کرتے ہوئے کہا کہ 13 جولائی 1931ء تحریکِ آزادیِ کشمیر کا نقطۂ آغاز ہے، جب اذان کی تکمیل کے دوران 22 کشمیریوں نے جامِ شہادت نوش کیا تھا۔ حریت رہنماؤں کا کہنا تھا کہ شہدا کو خراجِ عقیدت پیش کرنے کے لیے اپر اڈا لال چوک میں ایک عظیم الشان جلسہ ہوگا جس میں ہزاروں افراد شریک ہوں گے۔ پریس کانفرنس میں رہنماؤں نے مقبوضہ جموں و کشمیر میں جاری قربانیوں کا ذکر کرتے ہوئے عزم کا اعادہ کیا کہ بھارت سے آزادی کے لیے کشمیریوں کی جدوجہد منطقی انجام تک جاری رہے گی۔ مزید برآں، حریت رہنماؤں نے ایران اور امریکہ کے درمیان امن و جنگ بندی کے قیام کے لیے وزیراعظم پاکستان شہباز شریف اور چیف آف ڈیفنس فورسز فیلڈ مارشل سید عاصم منیر کے کلیدی سفارتی اقدامات اور ثالثی کے کردار کو بھی بھرپور انداز میں سراہا۔