امریکا نے متحدہ عرب امارات کیلیے تجارت کے دروازے کھول دیے

امریکی صدر ڈونلڈ ٹرمپ نے متحدہ عرب امارات (یو اے ای) کو برآمدات کے لیے خصوصی سہولتیں اور رعایت حاصل کرنے والے ممالک کی فہرست (کنٹری گروپ اے-5) میں شامل کر لیا ہے۔ امریکی محکمہ تجارت کے بیورو آف انڈسٹری اینڈ سیکیورٹی کے مطابق، اس نئی درجہ بندی کے بعد اماراتی حکومت اور منظور شدہ تجارتی ادارے اب انفرادی لائسنس کے بغیر جدید امریکی ٹیکنالوجی، مصنوعی ذہانت (AI) چپس، فوجی سازوسامان، تجارتی سیٹلائٹس اور خلائی ٹیکنالوجی درآمد کر سکیں گے۔ اس فیصلے سے یو اے ای خلیجی خطے کا پہلا اور ترکیہ کے بعد مسلم دنیا کا دوسرا ملک بن گیا ہے جسے یہ خصوصی درجہ بندی ملی ہے۔ امریکی محکمہ تجارت کا کہنا ہے کہ یو اے ای واشنگٹن کا اہم تجارتی و دفاعی شراکت دار ہے اور اس اقدام سے دونوں ممالک کے تعلقات مزید مضبوط ہوں گے۔ دوسری جانب، ایران نے اس پر شدید ردعمل ظاہر کرتے ہوئے الزام عائد کیا ہے کہ یہ رعایت ایران کے خلاف امریکی اور اسرائیلی کارروائیوں میں تعاون کا صلہ ہے۔ ادھر بعض امریکی قانون سازوں نے بھی حساس ٹیکنالوجی کی منتقلی پر قومی سلامتی کے خدشات کا اظہار کیا ہے، تاہم امریکی انتظامیہ کا مؤقف ہے کہ برآمدی نگرانی کے سخت نظام کے باعث یہ خطرات قابو میں رہیں گے۔