کراچی میں 3 بچوں سمیت 27 افغان مہاجرین گرفتار

کراچی کے ضلع وسطی (ڈسٹرکٹ سینٹرل) میں پولیس نے مختلف علاقوں میں انٹیلی جنس بیسڈ کارروائیاں کرتے ہوئے غیر قانونی طور پر مقیم 3 بچوں سمیت 27 افغان باشندوں کو حراست میں لے لیا ہے۔ ایس ایس پی ڈسٹرکٹ سینٹرل ڈاکٹر عمران خان کے مطابق، نیو کراچی صنعتی ایریا پولیس نے مختلف مقامات پر چھاپہ مار کر 23 افغان شہریوں کو گرفتار کیا۔ اسی طرح، رضویہ سوسائٹی پولیس نے ایک افغان باشندے بخت محمد کو حراست میں لیا، جبکہ عزیز آباد پولیس نے کارروائی کرتے ہوئے دو سگے بھائیوں سمیت 3 افغان بچوں (قاسم، عزت اور عمر) کو اپنی تحویل میں لیا۔ پولیس حکام کا کہنا ہے کہ حراست میں لیے گئے تمام افغان باشندوں کو ضابطے کی کارروائی کے بعد ان کے اپنے وطن واپسی کے لیے قائم کیے گئے مخصوص کیمپ کے متعلقہ حکام کے حوالے کر دیا گیا ہے۔