پی ڈی ایم اے نے گلیشیائی جھیلوں کے پھٹنے کا الرٹ جاری کر دیا

پراونشل ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا کے بالائی اضلاع میں شدید گرم موسم اور آئندہ ہفتے متوقع تیز بارشوں کے پیشِ نظر گلیشیائی جھیلوں کے پھٹنے (GLOF)، فلش فلڈ اور لینڈ سلائیڈنگ کا الرٹ جاری کر دیا ہے۔ پی ڈی ایم اے کے مطابق، موسم کی شدت کے باعث گلیشیئرز کے تیزی سے پگھلنے کا خدشہ ہے، جس سے جھیلیں پھٹنے اور سیلابی صورتحال پیدا ہو سکتی ہے۔ اس خطرے سے نمٹنے کے لیے اپر و لوئر چترال، سوات، بحرین، اپر دیر، کوہستان اور مانسہرہ کی ضلعی انتظامیہ کو ہائی الرٹ رہنے اور حساس گلیشیائی علاقوں کی مسلسل نگرانی یقینی بنانے کی ہدایات جاری کر دی گئی ہیں۔ اتھارٹی نے ریسکیو اداروں، بھاری مشینری اور ہنگامی عملے کو چوبیس گھنٹے تیار رکھنے کا حکم دیا ہے تاکہ خطرے سے دوچار آبادی کو بروقت محفوظ مقامات پر منتقل کیا جا سکے۔ مزید برآں، پی ڈی ایم اے نے سیاحوں اور مقامی عوام کو غیر ضروری سفر سے گریز کرنے، دریاؤں، ندی نالوں اور تیز بہاؤ والے پانی کے قریب جانے سے سختی سے اجتناب کرنے کی تلقین کی ہے۔