سندھ میں دہشت گردوں، جرائم پیشہ افراد اور سہولت کاروں کیخلاف کارروائیاں تیز کرنے کا فیصلہ

وزیراعلیٰ سندھ سید مراد علی شاہ کی صدارت میں وزیراعلیٰ ہاؤس میں ایک اعلیٰ سطحی اجلاس منعقد ہوا، جس میں صوبے بھر میں دہشت گردوں، مجرمانہ عناصر اور ان کے سہولت کاروں کے خلاف انٹیلیجنس پر مبنی ٹارگٹڈ آپریشنز کو مزید تیز کرنے کا فیصلہ کیا گیا ہے۔ اس اہم اجلاس میں صوبائی وزراء، سول انتظامیہ کے اعلیٰ حکام سمیت پاک فوج، رینجرز، پولیس اور انٹیلیجنس اداروں کے سربراہان نے شرکت کی۔ اجلاس کے دوران صوبے کی مجموعی امن و امان کی صورتحال، تازہ ترین خطرات اور انٹیگریٹڈ ریسپانس فریم ورک پلان کا تفصیلی جائزہ لیا گیا۔ شرکاء نے ابھرتے ہوئے سکیورٹی چیلنجز سے نمٹنے کے لیے قانون نافذ کرنے والے اداروں کی تیاریوں پر اطمینان کا اظہار کرتے ہوئے عوام کو محفوظ ماحول فراہم کرنے کے عزم کا اعادہ کیا۔ اجلاس میں سکیورٹی خطرات کے سدِباب کے لیے بروقت انٹیلیجنس شیئرنگ اور پیشگی فعال اقدامات کی اہمیت پر زور دیا گیا۔ وزیراعلیٰ سندھ نے تمام سکیورٹی اور قانون نافذ کرنے والے اداروں کے مابین تعاون کو سراہتے ہوئے ہدایت کی کہ امن و امان برقرار رکھنے کے لیے مربوط کوششوں کو مزید بڑھایا جائے تاکہ ریاست کی رٹ کو مضبوط تر کیا جا سکے۔