امریکی یہودیوں میں اسرائیلی وزیراعظم بنجمن نیتن یاہو کی مقبولیت مٹی میں مل گئی

ایک نئے قومی سروے میں یہ سنسنی خیز انکشاف سامنے آیا ہے کہ امریکا کے یہودی شہری نیویارک سٹی (NYC) کے میئر مامدانی کی کارکردگی کو اسرائیلی وزیراعظم بنجمن نیتن یاہو کے مقابلے میں زیادہ پسند کرتے ہیں۔ ایسوسی ایٹڈ پریس-نارک (AP-NORC) سینٹر فار پبلک افیئرز ریسرچ کے سروے کے مطابق، 44 فیصد امریکی یہودیوں نے میئر مامدانی کے حق میں رائے دی جبکہ اس کے برعکس صرف 32 فیصد یہودیوں نے دائیں بازو کے اسرائیلی وزیراعظم بنجمن نیتن یاہو کی حمایت کی، جبکہ 59 فیصد نے نیتن یاہو کو منفی نظر سے دیکھا۔ ماہرین کے مطابق یہ نتائج حیران کن ہیں کیونکہ میئر مامدانی ماضی میں اسرائیل کے شدید نقاد رہے ہیں اور انہوں نے اسرائیل کو بطور یہودی ریاست تسلیم کرنے سے انکار سمیت “انتفادہ” جیسے نعروں کی مخالفت نہ کر کے یہودی برادری میں تنازعات کو جنم دیا تھا۔ تاہم، حالیہ سروے ظاہر کرتا ہے کہ خاص طور پر نوجوان اور لبرل یہودی، غزہ و لبنان کی جنگ، ایران کے خلاف فوجی اقدامات اور مغربی کنارے پر اسرائیلی بستیوں کی تعمیر کے باعث نیتن یاہو حکومت سے شدید مایوس ہو چکے ہیں۔ سروے کے مطابق تقریباً 30 فیصد امریکی یہودیوں کا ماننا ہے کہ اسرائیل نے غزہ میں نسل کشی کی ہے۔ اس کے علاوہ سروے میں یہ بھی بتایا گیا ہے کہ عام امریکی عوام کے مقابلے میں یہودی ووٹرز صدر ڈونلڈ ٹرمپ کی کارکردگی کو نمایاں طور پر ناپسند کرتے ہیں۔