ایف آئی اے کی جانب سے 39 ہزار سے زائد مسافروں کو آف لوڈ کیے جانے کا انکشاف

وفاقی تحقیقاتی ایجنسی (ایف آئی اے) کی جانب سے جاری کردہ تین سالہ کارکردگی رپورٹ میں انکشاف ہوا ہے کہ ملک بھر کے مختلف ایئرپورٹس سے 39 ہزار 786 مسافروں کو بیرون ملک سفر کرنے سے روکتے ہوئے آف لوڈ کیا گیا ہے۔ ایکسپریس نیوز کو موصول ہونے والی دستاویزات کے مطابق، سال 2023 میں پیش آنے والے لیبیا کشتی حادثے کے بعد وزیراعظم شہباز شریف کی ہدایت پر ایئرپورٹس پر چیکنگ کا عمل سخت کیا گیا تھا۔ رپورٹ کے مطابق، سب سے زیادہ یعنی 20 ہزار 408 مسافروں کو نامکمل سفری دستاویزات کی وجہ سے روکا گیا، جبکہ 12 ہزار 673 افراد کو لو پروفائل اور مشکوک ٹریول پلان (جیسے پہلی بار سفر کرنے والے یومیہ اجرت پر کام کرنے والے ملازمین جن کا عمرہ، دبئی یا ترکیہ کا ویزا مشکوک تھا) کی بنیاد پر آف لوڈ کیا گیا۔ اس کے علاوہ اسٹاپ لسٹ یا انٹرپول کی پابندی کے باعث 3 ہزار 450، غلط روٹ کی وجہ سے 505، اور جعلی ویزوں یا ورک پرمٹ کی وجہ سے 281 مسافروں کو فلائٹ سے اتارا گیا۔ دستاویزات میں مزید بتایا گیا ہے کہ غیر مطمئن ٹریول ہسٹری پر 176، دستاویزات کی تصدیق کے لیے 145، کم عمری پر 258 اور وزٹ ویزے پر نوکری کی تلاش میں جانے والے 24 مسافروں کے خلاف بھی کارروائی کی گئی۔