عالمی و مقامی سطح پر سونے کی قیمت میں پھر اضافہ

عالمی اور مقامی صرافہ مارکیٹوں میں سونے کی قیمتوں میں ایک دن کی کمی کے بعد آج پھر بڑا اضافہ ریکارڈ کیا گیا ہے۔ بین الاقوامی بلین مارکیٹ میں ہفتے کے روز فی اونس سونے کی قیمت 11 ڈالر بڑھنے سے نئی عالمی قیمت 4 ہزار 111 ڈالر کی بلند سطح پر پہنچ گئی۔ عالمی مارکیٹ میں تیزی کے زیرِ اثر ملک بھر کی مقامی صرافہ مارکیٹوں میں بھی کاروباری ہفتے کے آخری روز 24 قیراط کے حامل فی تولہ سونے کی قیمت میں 1,100 روپے کا اضافہ ہوا، جس سے نئی قیمت 4 لاکھ 33 ہزار 536 روپے ہو گئی ہے۔ اسی طرح فی 10 گرام سونے کی قیمت بھی 943 روپے بڑھ کر 3 لاکھ 71 ہزار 687 روپے کی سطح پر آگئی ہے۔ سونے کے ساتھ ساتھ مقامی مارکیٹ میں چاندی کی قیمتوں کو بھی پر لگ گئے، جہاں فی تولہ چاندی 30 روپے کے اضافے سے 6 ہزار 462 روپے اور فی 10 گرام چاندی 26 روپے بڑھ کر 5 ہزار 540 روپے کی سطح پر بند ہوئی۔