امریکا اور اسرائیل کو جنگی جرائم کی سزا اور ہرجانہ ادا کرنا ہوگا: سربراہ ایرانی عدلیہ

ایرانی عدلیہ کے سربراہ نے امریکا اور اسرائیل کے خلاف سخت موقف اختیار کرتے ہوئے اعلان کیا ہے کہ دونوں ممالک کو خطے میں کیے جانے والے جنگی جرائم کی سزا بھگتنی ہوگی اور اس کا بھاری ہرجانہ ادا کرنا پڑے گا۔ تہران میں ایک اہم تقریب سے خطاب کرتے ہوئے انہوں نے واضح کیا کہ معصوم شہریوں کے قتلِ عام، انسانی حقوق کی سنگین خلاف ورزیوں اور بین الاقوامی قوانین کو پسِ پشت ڈال کر کی جانے والی جارحیت پر ان دونوں طاقتوں کو کسی صورت معافی نہیں مل سکتی۔

ایرانی عدلیہ کے سربراہ کا کہنا تھا کہ امریکا اور صیہونی حکومت (اسرائیل) نے مل کر مشرقِ وسطیٰ میں جو تباہی پھیلائی ہے، اس کے سنگین نتائج اب ان کا پیچھا کر رہے ہیں۔ انہوں نے بین الاقوامی برادری اور قانونی اداروں سے مطالبہ کیا کہ وہ اسرائیل کی ریاستی دہشت گردی اور اس کی پشت پناہی کرنے والے امریکا کو کٹہرے میں لائیں، کیونکہ عالمی امن کے قیام کے لیے ان کے جرائم پر سزا دینا اور متاثرین کو ہرجانہ دلوانا انتہائی ناگزیر ہو چکا ہے