مصنوعی کششِ ثقل والے خلائی اسٹیشنز حقیقت کے قریب تر

واشنگٹن: ایسے جدید ترین خلائی اسٹیشنز، جو مصنوعی کششِ ثقل پیدا کر کے انسانوں کو نظامِ شمسی کی گہرائیوں تک محفوظ سفر کے قابل بنائیں گے، اب حقیقت کے بالکل قریب پہنچ رہے ہیں۔ امریکی خلائی کمپنی ‘واسٹ’ (Vast) ایک ایسے بڑے اور جدید خلائی رہائشی مرکز کی تیاری پر کام کر رہی ہے جو اپنی گردش کے ذریعے پیدا ہونے والی سینٹریپیٹل فورس (Centripetal Force) کو استعمال کر کے مصنوعی کششِ ثقل پیدا کرے گا۔ اس انقلابی ٹیکنالوجی کی بدولت خلا باز طویل عرصے تک خلا میں قیام کر سکیں گے، اور انہیں مائیکرو گریویٹی یا زیرو گریویٹی کے باعث پیدا ہونے والے شدید جسمانی نقصانات کا سامنا نہیں کرنا پڑے گا، جس سے مریخ اور اس سے بھی دور کے مقامات تک طویل المدت انسانی مشنز کی راہ ہموار ہوگی۔

کمپنی کے نائب صدر ٹام شیلے نے اس منصوبے کے حوالے سے گفتگو کرتے ہوئے کہا کہ مصنوعی کششِ ثقل والے خلائی اسٹیشن ہمیں خلا میں پہلے سے کہیں زیادہ دور اور گہرائی تک جانے کا تاریخی موقع فراہم کریں گے۔ انہوں نے وضاحت کی کہ خلا بازوں کو درپیش سب سے بڑا مسئلہ یہ ہوتا ہے کہ مائیکرو گریویٹی کی وجہ سے ان کی ہڈیاں تیزی سے کمزور اور پٹھے سکڑنے لگتے ہیں، لیکن اگر خلائی اسٹیشن میں زمین جیسا مصنوعی ماحول پیدا کر لیا جائے تو انسان بالکل اسی طرح صحت مند رہ سکتے ہیں جیسے زمین پر ہوتے ہیں۔ ٹام شیلے کے مطابق، سائنسی نظریات اس بات کی تصدیق کرتے ہیں کہ اس ماحول میں انسان زیادہ عرصے تک خلا میں محفوظ رہ سکیں گے اور انہوں نے زور دیا کہ بنیادی طور پر سائنس دانوں کا اصل کام بھی یہی ہے کہ وہ خلا میں انسانوں کو زندہ اور محفوظ رکھیں۔