عالمی تنازعات میں شدت، سی آئی ایس ممالک کو مشترکہ سلامتی کیلئے تعاون بڑھانا ہوگا: پوتن

روسی صدر ولادیمیر پوتن نے دنیا کے مختلف خطوں میں بڑھتے ہوئے تنازعات اور پیچیدہ جیو پولیٹیکل صورتحال کے پیشِ نظر دولتِ مشترکہ کی آزاد ریاستوں (سی آئی ایس) پر زور دیا ہے کہ وہ مشترکہ سلامتی، خودمختاری اور علاقائی استحکام کے تحفظ کے لیے باہمی تعاون کو مزید مضبوط بنائیں۔ ماسکو میں منعقدہ سی آئی ایس رکن ممالک کی سلامتی کونسلوں کے سیکریٹریوں کے 14ویں اجلاس کے شرکاء کو بھیجے گئے پیغام میں صدر پوتن نے کہا کہ موجودہ عالمی حالات سیکیورٹی چیلنجز پر جامع غور و فکر کے متقاضی ہیں۔ انہوں نے کہا کہ رکن ممالک کو اپنی سلامتی کونسلوں کی تجزیاتی اور پیش گوئی کی صلاحیتوں کا بھرپور استعمال کرنا چاہیے تاکہ شہریوں کو اندرونی و بیرونی خطرات سے محفوظ رکھا جا سکے۔ صدر پوتن نے امید ظاہر کی کہ یہ اجلاس معروضی جائزے اور قریبی عملی رابطوں کے ذریعے خطے کے استحکام اور کثیر الجہتی تعاون کی توسیع میں اہم کردار ادا کرے گا۔