تربیلہ ڈیم ٹی فائیو پاور پراجیکٹ: سرنگ اور پاور ہاؤس سے پانی نکال لیا گیا

تربیلا ڈیم کے ٹی فائیو (T5) پاور پراجیکٹ کی سرنگ اور پاور ہاؤس میں داخل ہونے والا پانی مکمل طور پر نکال لیا گیا ہے اور صورتحال انتظامی لحاظ سے مکمل طور پر کنٹرول میں ہے۔ ڈپٹی کمشنر ہری پور وسیم احمد کے مطابق واقعے کے فوری بعد پاور پراجیکٹ پر موجود تمام عملے اور ورکرز کو بحفاظت باہر نکال لیا گیا تھا۔ انہوں نے بتایا کہ پاور پراجیکٹ کا صرف ایک محدود حصہ متاثر ہوا ہے، تاہم تمام تر صورتحال قابو میں ہے اور واپڈا کی تکنیکی ٹیمیں پولیس کے ہمراہ موقع پر موجود رہ کر نگرانی کر رہی ہیں۔ ڈپٹی کمشنر نے واضح کیا کہ قریبی آبادیوں کو واقعے کے باعث کسی قسم کا خطرہ لاحق نہیں ہے، جبکہ حادثے کی بنیادی وجوہات اور محرکات کا تعین کرنے کے لیے تحقیقات کا آغاز کر دیا گیا ہے۔