میٹا نے پی ٹی اے کی درخواست پر ایک لاکھ 76 ہزار اکاؤنٹس بند کردیے

پاکستان ٹیلی کمیونیکیشن اتھارٹی (پی ٹی اے) کی درخواست پر میٹا نے ری سائیکل (غیر فعال و منسوخ شدہ) موبائل نمبرز پر رجسٹرڈ 1 لاکھ 76 ہزار واٹس ایپ اکاؤنٹس کو فوری طور پر بلاک کر دیا ہے۔

پی ٹی اے حکام کے مطابق، ٹیلی کام کمپنیوں کی طرف سے جاری کردہ غیر فعال نمبرز اور بعد میں دوسرے صارفین کو فروخت کیے جانے والے (ری سائیکل) نمبرز پر پرانے واٹس ایپ اکاؤنٹس کی موجودگی سائبر فراڈ اور آن لائن دھوکہ دہی کا ایک بڑا ذریعہ بن رہی تھی، جس پر متعدد شکایات موصول ہوئی تھیں۔ اس سیکیورٹی خطرے سے نمٹنے کے لیے پی ٹی اے نے قدم اٹھاتے ہوئے ٹیلی کام آپریٹرز کے پاس موجود 1 کروڑ 60 لاکھ ری سائیکل نمبرز میں سے 1 کروڑ نمبرز کا ڈیٹا میٹا کو فراہم کیا تھا۔

تحقیقات اور ڈیٹا کی تصدیق کے بعد پی ٹی اے اور میٹا کے درمیان غیر فعال نمبرز کے واٹس ایپ اکاؤنٹس کو مستقل طور پر بند کرنے کا ایک باقاعدہ طریقہ کار طے پا گیا ہے۔ اس طریقہ کار کے تحت اب ہر ماہ 5 ہزار ری سائیکل نمبرز میٹا کو بھیجے جائیں گے تاکہ ان پر فعال پرانے اکاؤنٹس کو مرحلہ وار بلاک کیا جا سکے۔ پی ٹی اے کے مطابق، میٹا کے ساتھ اس باہمی تعاون کی بدولت گزشتہ سال موصول ہونے والی 82 فیصد سائبر شکایات کا کامیا بی سے ازالہ کیا گیا ہے