وزیراعظم کے نام پر 13 ہزار روپے انعام کا لالچ: این سی سی آئی اے نے شہریوں کو جعلی پیغامات اور سائبر فراڈ سے خبردار کر دیا

نیشنل سائبر کرائم انویسٹی گیشن ایجنسی (NCCIA) نے شہریوں کو وزیراعظم کے نام پر 13 ہزار روپے انعام ملنے کا جھانسہ دینے والی جعلی اسکیموں اور سائبر فراڈ سے شدید خبردار کیا ہے۔ ایجنسی کے مطابق سائبر مجرمان جعلی پیغامات کے ذریعے شہریوں کو مشکوک لنکس پر کلک کرنے پر اکساتے ہیں تاکہ ان کی ذاتی، حساس اور بینکنگ معلومات حاصل کر کے رقم چوری کی جا سکے۔ ڈی جی این سی سی آئی اے نے شہریوں پر زور دیا ہے کہ وہ غیر تصدیق شدہ لنکس پر کلک کرنے اور ایسے گمراہ کن پیغامات کو آگے پھیلانے سے مکمل اجتناب کریں۔ انہوں نے واضح کیا کہ ایجنسی کی سائبر فراڈ میں ملوث عناصر کے خلاف ‘زیرو ٹالرنس پالیسی’ نافذ العمل ہے اور شہری کسی بھی مشکوک پیغام کی صورت میں فوری طور پر ہیلپ لائن 1799 پر یا قریبی این سی سی آئی اے سرکل میں شکایت درج کروائیں۔