سپارکو نے پاکستان سپیس بیسڈ آگمینٹیشن سسٹم متعارف کرا دیا

پاکستان کے قومی خلائی ادارے (سپارکو) نے ’پاکستان اسپیس بیسڈ آگمینٹیشن سسٹم‘ (Pak-SBAS) متعارف کرا دیا ہے، جسے پاک سیٹ ایم ایم ون (PakSat-MM1) سیٹلائٹ کے ذریعے چلایا جا رہا ہے۔ ترجمان سپارکو کے مطابق یہ جدید ترین سسٹم انتہائی درست اور قابلِ اعتماد پوزیشننگ، نیوی گیشن اور ٹائمنگ کی سہولیات فراہم کرتا ہے، جسے فی الوقت تھل ڈیزرٹ ریلی میں گاڑیوں کی ریسنگ کو تیز رفتار اور محفوظ بنانے کے لیے آزمائشی طور پر استعمال کیا جا رہا ہے۔ دوسری جانب سیکورٹیز اینڈ ایکسچینج کمیشن آف پاکستان (SECP) کی جانب سے سینیٹ کی قائمہ کمیٹی کو پیش کی گئی رپورٹ کے مطابق، ملک میں سیٹلائٹ انٹرنیٹ کی فراہمی کے لیے 6 کمپنیاں رجسٹرڈ ہو چکی ہیں۔ چیئرمین قائمہ کمیٹی رانا محمود الحسن کے خط پر فراہم کی گئی تفصیلات کے مطابق پاکستان سپیس ایکٹیویٹیز ریگولیٹری بورڈ کے قیام کے بعد ایتھر ون، فلیناوٹکس، گلیکسی سپیس اور سپیس پی جیسی 4 نئی کمپنیاں رجسٹرڈ ہوئی ہیں، جبکہ اسٹار لنک اور اسپیس سیل پاکستان پہلے ہی مقامی کمپنیوں کے طور پر خود کو رجسٹر کروا چکی ہیں۔