انسٹاگرام پر کم عمر صارفین کی شناخت مصنوعی ذہانت سے کی جائے گی: میٹا کا اعلان

میٹا نے انسٹاگرام کے کم عمر صارفین کو نامناسب مواد سے بچانے اور محفوظ ڈیجیٹل ماحول فراہم کرنے کے لیے صارف کی حقیقی عمر کا تخمینہ لگانے والی مصنوعی ذہانت (AI) ٹیکنالوجی دنیا بھر میں متعارف کرانے کا باضابطہ اعلان کیا ہے۔ کمپنی کی بلاگ پوسٹ کے مطابق یہ سمارٹ AI سسٹم صارف کی بتائی گئی تاریخِ پیدائش پر منحصر رہنے کے بجائے اس کے اکاؤنٹ کا جائزہ لے کر حقیقی عمر کا تعین کرے گا۔ اگر 18 سال سے کم عمر کوئی صارف اپنی غلط عمر درج کرتا ہے، تو یہ ٹیکنالوجی اسے خودکار طور پر ‘ٹین اکاؤنٹس’ (Teen Accounts) میں منتقل کر دے گی۔ میٹا نے اپریل 2025 میں اس اے آئی تصدیقی عمل کا تجرباتی آغاز کیا تھا، جبکہ ستمبر 2024 سے متعارف کروائے گئے ٹین اکاؤنٹس 13 سے 17 سال کے نوجوانوں کو اضافی حفاظتی فیچرز اور محدود محتویات کی فراہمی کو یقینی بناتے ہیں۔ کمپنی کا کہنا ہے کہ عالمی سطح پر اس اقدام کے ساتھ ساتھ امریکہ میں والدین کو آگاہی ویڈیوز کے ذریعے بچوں کے آن لائن تحفظ پر مبنی اقدامات سے بھی روشناس کرایا جا رہا ہے۔