امریکا سفارتکاری کے دوران بھی ایران پر نئے حملوں کی تیاری کر رہا ہے: امریکی ٹی وی

سفارتی سطح پر جاری تمام تر کوششوں کے باوجود امریکا نے ایران پر نئے حملوں کی تیاریاں شروع کر دی ہیں۔ امریکی ٹی وی ‘سی بی ایس نیوز’ نے منصوبہ بندی سے باخبر ذرائع کے حوالے سے رپورٹ کیا ہے کہ صدر ڈونلڈ ٹرمپ کی انتظامیہ ایران کے خلاف نئی عسکری کارروائی کے لیے ہوم ورک مکمل کر رہی ہے، تاہم اس حوالے سے ابھی حتمی فیصلہ سامنے نہیں آیا۔ صورتحال کی سنگینی کا اندازہ اس بات سے لگایا جا سکتا ہے کہ صدر ٹرمپ نے سوشل میڈیا پر اپنے ایک بیان میں اعلان کیا ہے کہ وہ حکومتی مصروفیات کے باعث اپنے بیٹے ڈونلڈ ٹرمپ جونیئر کی شادی میں شرکت نہیں کر سکیں گے۔ صدر ٹرمپ اپنا ویک اینڈ نیو جرسی میں واقع اپنے گولف ریزورٹ پر گزارنے والے تھے، لیکن اب وہ ہنگامی طور پر وائٹ ہاؤس واپس پہنچ رہے ہیں۔

دوسری جانب، انٹیلی جنس اور عسکری ذرائع کا کہنا ہے کہ ممکنہ حملوں اور سیکیورٹی خطرات کے پیشِ نظر امریکی فوج اور انٹیلی جنس کمیونٹی کے متعدد اعلیٰ حکام نے اپنے تعطیلات کے منصوبے منسوخ کر دیے ہیں۔ دفاعی حکام اس وقت مشرقِ وسطیٰ میں ممکنہ ایرانی ردعمل کے خدشات اور خطے میں امریکی فوجی موجودگی کو کم کرنے کی پالیسی کے تحت افواج کے جزوی انخلا کے ساتھ ساتھ بیرونِ ملک اڈوں پر ‘اسٹینڈ بائی’ (مستعد) فوجیوں کی فہرستوں کو اپ ڈیٹ کر رہے ہیں۔ واضح رہے کہ رواں سال اپریل کے اوائل میں ہونے والی عارضی جنگ بندی کے بعد سے دونوں ممالک نے ایک دوسرے پر براہِ راست حملوں سے گریز کیا تھا تاکہ بالواسطہ مذاکرات کو موقع مل سکے۔ تاہم، وائٹ ہاؤس کی ترجمان اینا کیلی نے امریکی عزم کا اعادہ کرتے ہوئے واضح کیا ہے کہ صدر ٹرمپ کی ‘ریڈ لائنز’ بالکل واضح ہیں؛ ایران کو کسی صورت جوہری ہتھیار حاصل کرنے کی اجازت دی جائے گی اور نہ ہی وہ اپنی افزودہ یورینیم برقرار رکھ سکتا ہے۔