ایرانی بحریہ کا دشمن افواج کو کسی بھی مقام پر مفلوج کرنے کا دعویٰ

تہران: ایرانی بحریہ کے چیف کمانڈر ایڈمرل شاہرام ایرانی نے امریکہ کو سخت تنبیہ کرتے ہوئے کہا ہے کہ ایران کی مسلح افواج میں اتنی صلاحیت اور مہارت موجود ہے کہ وہ ضرورت پڑنے پر دشمن کی افواج کو کسی بھی مقام پر مکمل طور پر مفلوج کر سکتی ہیں۔

تہران میں ایک تقریب کے دوران گفتگو کرتے ہوئے ایڈمرل شاہرام ایرانی نے کہا کہ ایرانی بحریہ کی جدید تزویراتی کارروائیوں اور حکمتِ عملی نے مخالفین کو حیران کر دیا ہے اور ان کی جنگی و آپریشنل صلاحیتوں کو شدید متاثر کیا ہے۔ انہوں نے دعویٰ کیا کہ ایرانی بحری اقدامات کے نتیجے میں دشمن کے جنگی جہازوں کی آپریشنل صلاحیت طویل عرصے تک غیر فعال اور ناکارہ رہی ہے۔

کمانڈر ایرانی بحریہ نے مزید کہا کہ دشمن کو اس کے معاندانہ مقاصد کے حصول سے روکنا اور علاقائی سمندری حدود کا تحفظ کرنا ایرانی بحریہ کا بنیادی مشن ہے۔ انہوں نے واضح کیا کہ خلیجِ فارس اور عالمی پانیوں میں مخالف افواج کی تمام سرگرمیوں کی مسلسل اور گہری نگرانی کی جا رہی ہے، اور کسی بھی مہم جوئی کا منہ توڑ جواب دیا جائے گا۔