ٹرمپ کی ریاست نیو میکسیکو کا نام تبدیل کرکے نیو امریکا رکھنے کی تجویز

واشنگٹن: امریکی صدر ڈونلڈ ٹرمپ نے آبنائے ہرمز، خلیج میکسیکو اور جھیل اونٹاریو کے جغرافیائی ناموں کو تبدیل کرنے کی تجاویز و مطالبات کے بعد اب امریکی ریاست ’نیو میکسیکو‘ (New Mexico) کا نام تبدیل کرنے کی متنازعہ تجویز پیش کر دی ہے۔

صدر ڈونلڈ ٹرمپ نے اپنے ایک بیان میں دعویٰ کیا کہ متعدد افراد نے انہیں ریاست کا نام تبدیل کرنے کا مشورہ دیا ہے، لہٰذا نیو میکسیکو کا نام بدل کر ’نیو امریکہ‘ (New America) رکھا جانا چاہیے، جو اس ریاست کی پہچان کے لیے زیادہ باوقار، خوبصورت اور مناسب ہے۔

دوسری جانب نیو میکسیکو کی گورنر مشیل لوجن گریشم (Michelle Lujan Grisham) نے صدر ٹرمپ کی اس تجویز کو فوری طور پر مسترد کرتے ہوئے واضح کیا ہے کہ ان کی ریاست کا نام کسی قسم کی سیاسی بحث کا موضوع نہیں ہے۔ گورنر مشیل کا کہنا تھا کہ نیو میکسیکو کا نام خود امریکہ کے وجود میں آنے سے بھی سو سال سے زیادہ قدیم ہے۔ انہوں نے الزام عائد کیا کہ صدر ٹرمپ ملک میں بڑھتی ہوئی مہنگائی اور معاشی مسائل سے عوام کی توجہ ہٹانے کے لیے ایسے غیر سنجیدہ بیانات دے رہے ہیں۔