پی ٹی آئی کے احتجاج و لانگ مارچ کیخلاف درخواست سماعت کیلئے مقرر

پاکستان تحریکِ انصاف (پی ٹی آئی) کے 27 ستمبر کے مجوزہ احتجاج اور لانگ مارچ کے خلاف اسلام آباد ہائی کورٹ میں آئینی درخواست دائر کر دی گئی ہے۔ رجسٹرار دفتر نے درخواست کو ابتدائی سماعت کے لیے کل کے لیے مقرر کر دیا ہے، جہاں اسلام آباد ہائی کورٹ کے چیف جسٹس سرفراز ڈوگر شہری وقاص احمد کی جانب سے دائر کردہ اس درخواست پر باقاعدہ سماعت کریں گے۔

دائر کی گئی درخواست میں عدالتِ عالیہ سے استدعا کی گئی ہے کہ 27 ستمبر کو اسلام آباد کی تمام اہم شاہراہیں اور راستے شہریوں کی آمدورفت کے لیے کھلے رکھنے کا حکم جاری کیا جائے، جبکہ سرکاری دفاتر اور وسائل کے سیاسی مقاصد کے لیے استعمال کو روکا جائے۔ علاوہ ازیں، درخواست گزار نے عدالت سے یہ استدعا بھی کی ہے کہ وزیراعلیٰ کے دفتر (چیف منسٹر آفس) کو سیاسی سرگرمیوں اور لانگ مارچ کے مقاصد کے لیے استعمال کرنے کے حوالے سے باقاعدہ ڈیکلریشن جاری کیا جائے۔