امریکی کوریڈور سے گزرنا مشکل، بحری جہاز ایران کے مقررہ راستوں سے گزریں: پاسداران انقلاب

ایران کی پاسدارانِ انقلاب اسلامی (IRGC) نے خلیجِ فارس اور آبنائے ہرمز کی موجودہ سیکورٹی صورتحال پر ایک اہم انتباہی بیان جاری کرتے ہوئے کہا ہے کہ آبنائے ہرمز سے گزرنے والے بحری جہازوں کا امریکی کوریڈور کے ذریعے محفوظ سفر اب انتہائی دشوار ہو چکا ہے۔ پاسدارانِ انقلاب کی جانب سے جاری ترجمانی بیان میں تجارتی و ایندھن بردار جہازوں کو خبردار کیا گیا ہے کہ بحری جہاز خطرے سے بچنے اور محفوظ نقل و حمل کے لیے صرف ایران کے مقرر کردہ سمندری راستوں کا استعمال کریں۔ بیان میں مزید کہا گیا کہ امریکی تحفظ کے تحت خلیجِ عمان میں داخل ہونے والا کوئی بھی بحری جہاز تکنیکی و عسکری خطرات سے محفوظ نہیں ہے۔

ایرانی پاسدارانِ انقلاب نے واضح کیا ہے کہ خلیجِ فارس، حکمتِ عملی کے حامل اہم بحری راستے آبنائے ہرمز اور بحیرۂ عمان میں تمام تر بحری ٹریفک کی سخت نگرانی اور ڈرون و رڈار سسٹمز کے ذریعے مانیٹرنگ مسلسل جاری ہے۔ ایرانی حکام کے مطابق خطے میں امریکی یا مغربی اتحاد کی بحری موجودگی سیکیورٹی فراہم کرنے کے بجائے توازن کو بگاڑ رہی ہے، جس کے باعث تمام بین الاقوامی شپنک کمپنیوں کو ایرانی ہدایت نامے اور طے شدہ سمندری راہداریوں کی پابندی کرنے کی تاکید کی گئی ہے۔