جماعت اسلامی اور حکومت کے درمیان پٹرولیم لیوی کے معاملے پر مذاکرات کا آغاز

پٹرولیم لیوی کی شرح میں کمی اور عوام کو ریلیف کی فراہمی کے معاملے پر جماعتِ اسلامی پاکستان اور وفاقی حکومت کی ٹیم کے درمیان باقاعدہ مذاکرات کا آغاز ہو گیا ہے۔ مذاکراتی نشست میں جماعتِ اسلامی کے وفد کی قیادت نائب امیر لیاقت بلوچ کر رہے ہیں، جبکہ وفد میں سید فراست شاہ، نصراللہ رندھاوا، عنایت اللہ خان، ضیاءالدین انصاری ایڈووکیٹ، نوید علی بیگ اور شاہد نعیم شامل ہیں۔ دوسری جانب حکومتی مذاکراتی ٹیم کی قیادت وفاقی وزیرِ منصوبہ بندی احسن اقبال کر رہے ہیں، جبکہ ان کے ہمراہ وزیراعظم کے مشیر رانا ثناء اللہ خان اور وزیرِ مملکت علی پرویز ملک بھی شامل ہیں۔

مذاکرات کی اس اہم نشست کے دوران جماعتِ اسلامی کی جانب سے پٹرولیم لیوی کے مکمل خاتمے یا اس کی شرح میں نمایاں کمی کے لیے تکنیکی و معاشی تجاویز پیش کی جائیں گی۔ جماعتِ اسلامی کی قیادی ٹیم پٹرولیم مصنوعات پر عائد بھاری لیوی کے بوجھ سے عوام کو درپیش مشکلات اور معاشی دباؤ سے حکومت کو تفصیلی طور پر آگاہ کرے گی اور اپنا موقف رکھے گی۔ جماعتِ اسلامی کا مؤقف ہے کہ پٹرولیم پروڈکٹس کی قیمتوں میں کمی کے بغیر مہنگائی کا خاتمہ ممکن نہیں، اسی لیے حکومت پر لیوی کا بوجھ کم کرنے کے لیے مسلسل دباؤ بڑھایا جا رہا ہے